التصميم الجرافيكي .. ماهو؟ وما أساسياته ، برامجة ، نصائح مهمه للتصميم
رحلتي مع التصميم | My Graphic Design Journey
السلام عليكم ورحمة الله وبركاته،
وصباح هادئ وجميل لكل أحد يشبهني شوي 🌤️
من فترة وأنا أفكّر أكتب عن بدايتي في التصميم الجرافيكي.
المجال اللي خذاني من مجرد فضول بسيط… إلى واحدة من أقرب الهوايات لقلبي.
البداية؟ كانت من كمبيوتر مكتبي 🎁
كنت بثاني متوسط، في وقت الكل فيه يسأل: “وش تبين تصيرين بالمستقبل؟”
كنت مو متأكدة من شيء… بس أعرف إني أحب أكتشف وأجرب.
وقتها، أمي وأبوي أهدونا أنا وأختي كمبيوتر مكتبي، جديد غير اللي كنا نلعب فيه أول.
وصرت كل يوم أدخل برنامج، أفتحه، أستكشفه، أقفله… وأعيد.
لكن البرنامج الوحيد اللي “خطفني” فعليًا؟
كان الفوتوشوب ...
أذكر أول نسخة فتحتها منه، قديمة جدًا، يمكن كثير ما يتذكّرونها حتى،
بس بالنسبة لي؟ كانت بداية شيء أكبر من مجرد برنامج.
أول دورة… أول خيبة بسيطة
في بداية الصيف، سجلت أنا وأختي في دورة فوتوشوب للمبتدئين، كنت فرحانة جدًا، أول مرة بحياتي أحضر شيء يشبه شغفي
لكن للأسف؟ الدورة ما كانت بمستوى التوقع، طلعت كلها تسليك بنظري الآن، مجرد رؤوس أقلام.
ومن وقتها، قررت أعتمد على نفسي ...
دخلت دروس يوتيوب، منتديات، طبّقت، قلّدت مصممين، جربت كل فكرة طاحت بعيني.
وكل ما تعلّمت خطوة، زادت رغبتي أفهم أكثر.
تطوّرت… بس ما خلّصت
مرت سنوات، وتدرجت مع كل إصدار جديد للفوتوشوب،
ومع الوقت بدأت ألاحظ إن المجال أوسع مما توقعت.
صحيح إن Adobe طلعت برامج كثيرة،
بس الفوتوشوب ظلّ هو المكان اللي أرجع له،
هو القاعدة اللي بنت معها أدواتي الباقية.
وكل سنة كنت أكتشف أشياء جديدة، وأجهل أشياء أكثر.
بس هذا اللي حبّبني فيه… دايم فيه شي جديد أتعلمه.
✦ عن الدراسة… واختيار الطريق
مع الوقت، بديت أفكر بشكل أعمق:
أنا فعلاً أحب التصميم، وأشوف نفسي فيه… بس هل دراستي ماشية مع هذا الشي؟
صرت أقول لنفسي: “لو رجع الزمن، باختار التخصص اللي يمشي مع شغفي، مو بس مع الظروف.”
وهنا أحب أقول شيء من القلب:
لا تدرسين شيء بس عشان الناس تتوقعه منك،
ولا تمشين بتخصص ما يشبهك،
خذي وقتك واختاري المجال اللي يضيف لك،
اللي تحسين إنك تملكينه وتحبينه، حتى لو الطريق له أطول.
في النهاية، الدراسة مو هدف…
هي وسيلة، ولازم تكون تفتح لك باب، مو تسكّرك عن نفسك.
يمكن تكون تدوينتي بسيطة،
لكنها طالعة من مكان صادق جدًا.
أنا ما كنت أعرف إن برنامج قديم، بواجهة رمادية،
بيصير بوابة لشيء يعبر عني بهذا الشكل.
وإذا كنتِ في البداية، أو تحسين إنك “مو بالمستوى”،
فـ حابة أقولك: كل مصمم بدأ من مكان يشبهك.
بس الفرق؟ إنك تستمرين.
في أمان الله، يا قارئة من نفس العالم اللي أحبّه 🤍
وأتمنى لو كلمة وحدة هنا ألهمتك تبدأين.
